𝗭𝗔𝗥𝗥𝗔𝗚𝗔, 𝗜𝗟𝗢𝗜𝗟𝗢 — Patay ang isa ka lalaki matapos nga naghampang sang basketball nga ginpatigayon sang Sangguniang Kabataan (SK) sa Zarraga, Iloilo.
Ang biktima amo si Wilmer Perania Borra, 44-anyos, residente sang Brgy. Dawis Sur, Zarraga, Iloilo.
Sa interview sang Bombo Radyo kay Albert Gimay, Head sang Zarraga Municipal Disaster Risk Reduction and Management Office (MDRRMO), iya ginpahayag nga wala nakakoordinar sa ila ang Sangguniang Kabataan nga amo ang nag-organize sa pahampang.
Suno kay Gimay, 2nd half na sang nagsulod sa hampang ang biktima, sa diin, nakabatyag ini sang paglingin sang ulo, rason nga gindala sa sagwa sang court agud i-check ang mga vital signs apang nag-seizure ini kag nagturong ang mata.
Ginpahayag man sini nga sang yara na sa ambulance ang biktima, nagreklamo ini nga indi na makaginhawa apisar nga naka-oxygen siya.
Sang nag-abot na sa ospital, liwat nga nag-seizure ini tubtob nga gin-revive sang lapit isa ka oras, apang ginbawian gid sang kabuhi.
Ginklaro man sang natungdan nga wala ini nag-inom sang tubig antes natabo ang insidente kag santo sa panaysayon sang himata sang biktima, wala ini sang ginasuprer nga sakit antes paman natabo ang insidente.
Nagpanugyan naman ang Municipal Disaster Risk Reduction and Management Office sa mga nagapaliga nga magkoordinar sa ila agud nga mahatagan sang assistance kun may matabo nga emerhensya.
