๐๐๐ฃ๐จ๐ญ, ๐๐๐ข๐๐๐ข ๐๐๐ง๐ฌ โ Patay ang isa ka lalaki matapos nga nakabunggo ang iya nga motorsilklo sa naka-park nga trailer truck sa Brgy. Loboc, Lapuz, Iloilo City.
Ang biktima amo si Jessmart Gabral, 23-anyos, kag residente sang Brgy. Mansaya, Lapuz, Iloilo City.
Sa interview sang Bombo Radyo kay Jesse Gabral, barangay kagawad sang Mansaya, Lapuz kag amay sang biktima, iya ginpahayag nga nagdul-ong lang man ang iya anak sa iya nga mga abyan gamit ang motorsiklo kag magapauli na kuntani.
Suno kay Gabral, masami nga puno sang naga-parking nga trailer truck ang dalan rason nga madamo man sang nagakadisgrasya nga motorista ilabi na kon kagab-ihon.
Ginpahayag man sini nga ini ang isa ka mayor nga problema sang ila nga barangay bangud iligal nga naga-park ang mga trailer truck sa dalan.
Nahibaluan nga bangud sa tuman ka baskog nga impact sang motorsiklo sa trailer truck, nabuka gid ang ulo sang biktima.
Ginlaragway naman sang amay nga mabuot kag nagaisahanon lamang nga lalaki nga anak ang nagtaliwan nga biktima.
Una na nga nagsulat ang Iloilo City Traffic Management Unit (ICTMU) sa mga operators sang trailer truck agud nga dumilian ang pag-park sa lugar, apang, makaligad lamang ang duha ka bulan, liwat na naman nga nagbalik parking ang mga truck.
