Patay ang isa lalaki matapos gin-alegar hungod nga nagpabunggo sa isa ka closed van sa Guimbal bridge nga amo ang nagaangot sa Barangay Bagumbayan kag Barangay Bongol, Guimbal, Iloilo.
Sa impormasyon sang Guimbal Municipal Police Station, sandig sa panaysayon sang testigo, nagalakat ang amo nga lalaki sa kilid sang dalan apang sang natalupangdan sini nga may nagapadulong nga salakyan, nagpatunga ini kag hungod nga nagpabunggo.
Ginpahayag nga daku ang pilas nga naangkon sini sa ulo rason nga gindeklarar nga dead on arrival sa ospital.
Wala pa subong sang pangalan nga gina-uyatan ang otoridad apang ginpahayag nga may problema sa paminsaron ang amo nga lalaki kag ulihi nga nakit-an nga nagalagaw malapit sa ospital sang banwa.
Ginpahayag man nga nagapalalagyo ang mga tawo kun magpalapit ini bangud nagapanghaboy sang bato.
Suno pa sa pulis, may tattoo nga barb wire sa tuo nga abaga sang biktima, maniwang, semi-kalbo ang haircut, kag ginabanta 25-30 anyos ang edad.
Nagapabilin naman sa kustodiya sang Guimbal Municipal Police Station ang driver sang closed van nga pauli na kuntani sa Miagao sang natabo ang insidente.#
