Patay ang isa ka lalaki matapos ginlabo sang tag-iya sang kaingod niya nga uma sa Barangay Binaliuan, Tigbauan, Iloilo.
Ang biktima amo si Wilfredo Geraldo, 49-anyos, residente sang Sitio Lumasog sa amo nga barangay.
Ang suspek amo si Roberto Caniban, 60-anyos kag residente man sang nasambit nga lugar.
Sa interview sang Bombo Radyo kay Police Captain Alfred Mansoy, hepe sang Tigbauan Municipal Police Station, iya ginpahayag nga alas-2:20 pa sang hapon natabo ang amo nga insidente apang pasado alas-7 na sa gab i nila nabaton ang report kung sa diin mismo ang asawa sang suspek ang nag- turnover sa iya sa mga kapulisan bangud may ginlabo kuno ini.
Gilayon ini nga gin- verify sang mga kapulisan matapos nga nagsugid ang asawa nga nagpauli nga may mga dugo ang bayo sang iya bana kag ginpadulongan man sang kapulisan ang nasambit nga lugar kag didto naabotan sa payag nga wala na sang kabuhi si Geraldo matapos ginhatok-hatok ang labo.
Suno kay Mansoy, magkaingod lang ang uma ni Geraldo kag Caniban nga kung sa diin may yara na nga daan sadto sang indi pag- intindihanay sa tunga nia apang gin-alegar nga naresolba naman ini sadto.
Sa subong, padayon ang imbestigasyon sa natabo nga krimen.
