ILOILO CITY – Gintiro sang ginapahayag riding in tandem ang manug-ihaw sang baboy sa Iloilo City Slaughterhouse sa Tacas, Jaro, Iloilo City.
Ang biktima ang ginkilala nga si Reynante Villanueva alyas Moroy, 50 anyos, residente sang South San Jose Molo, Iloilo City kag nagatrabaho sa Iloilo City Slaughterhouse.
Sa interview sang Bombo Radyo kay Ronilo, kaupod ni Villanueva sa trabaho, iya ginpahayag nga ginpatawag ang biktima sang gwardya sang Iloilo City Slaughterhouse bangud nga may nagapangita kay Villanueva.
Apang ginkakibot na lamang ni Ronilo nga may nag lupok na sang makaduha ka beses sa guwa nga bahin sang slaughterhouse.
Samtang suno naman kay Police Auxiliary Stephen Porral, may nagpalapit sa iya nga duha ka mga lalaki sakay sa XRM nga motorsiklo nga duag itom sa diin ila ginapangita si Villanueva.
Ginmanduan pa ni Porral ang duha ka mga lalaki nga kuhaon ang ila tagsa ka mga helmet apang ang angkas nga lalaki lamang ang nagkuha sang iya helmet.
Nagpakilala pa ang driver nga si alyas Mark sang Calumpang Iloilo.
Gilayon nga ginsugo ni Porral ang on-duty nga gwardya nga bantayan ang duha ka mga lalaki kag iya gintawag si Villanueva sa sulod sang slaughterhouse.
Sang nakaguwa na ang biktima, gintiro siya gilayon sang driver sang motorsiklo.
Gintinguhaan pa ni Villanueva nga likawan ang bala apang na-igo ini sa likod nga hawak sang iya nga lawas.
Dugang pa sang police auxiliary, wala sang plate number ang motor samtang naka jacket nga itom ang driver kag ang angkas naman nga lalaki ang naka sando nga puti kag lunsay mga naka shorts.
Sa bahin naman sang asawa sang biktima nga si Marcialie Villanueva, iya ginpahayag nga makapila na ka beses sila nga nakabaton sang death threat kag sa iya nga pagpati, kilala man niya ang nagtiro sa iya nga bana.
Padayon pa nga ginahibalo sang mga kapulisan ang motibo sa pagtiro sa biktima.
Sa subong, yara na sa ospital ang biktima agud nga dapatan sang nagakaigo nga pagbulong.
