Patay ang isa ka lalaki sa Barangay Talauguis, Zarraga, Iloilo matapos nga nakuryente.
Ang biktima amo si Elmer “Bong-bong” Almirante, 42, single, residente sang nasambit nga lugar.
Sa interview sang Bombo Radyo kay Robito Altadero, tiyo sang biktima, iya ginpahayag nga samtang nagapamati sila sang drama nga Provincial Jail, nakibot sila sang gulpiyada nga may nabatian nga paglagpok.
Suno kay Altadero, antes natabo ang insidente, nakit-an pa sini nga naglabay ang biktima sa ila puluy-an.
Sang nabatian nila ang paglagpok, gilayon sila naguwa sa puluy-an kon sa diin, nakit-an nila ang biktima nga nagakaya kag nagapanggit-om na.
Ginsaysay man sini nga nagauyat ang kamot sang biktima sa kuryente, kon sa diin, gintuyo pa sini nga kakson apang, iya nadumduman nga live wire ini.
Gilayon naman nga gin-utod sang bayaw sang biktima ang linya sang kuryente kag natigayon ini nga makuha kag gindala sa pinakamalapit nga ospital.
Apang, sang yara na ini sa ospital, gindeklara ini nga dead on arrival (DOA).
Ginalantaw naman sang pamilya sang biktima nga posible aksidente nga nasalapay ukon natandog sini ang live wire samtang nagalakat, rason nga nakuryente ini.
