ILOILO CITY – Ano ayhan ang imo reaction kun mahibaluan mo nga may anak ka gali sa luwas apang indi mo kilala?
Sa Chile, isa ka lalaki ang ginpalayas sa ila balay matapos nga nahibaluan nga may duha ini ka mga anak sa Venezuela.
Si Leonardo Sepúlveda Rodríguez ang naga-enjoy sang iya kabuhi upod sa iya asawa kag anak sa sulod sang 30 na ka tuig.
Apang sining ulihi lang, ginpalayas ini sa ila balay matapos natukiban sang isa niya ka anak nga may duha pagid ini ka mga anak sa Venezuela.
Ginkumpronta siya sang iya anak apang hugot ang iya pagpanginwala bangud nga wala siya sang ideya kag suno sa iya, wala man siya nakapadulong sa Venezuela kag nag-angkon sang duha ka mga anak.
Apisar sang iya pagpaathag, ginpalayas siya sa gihapon sang iya asawa.
Sang ulihi, natukiban nga naguba ang pamilya ni Leonardo bangud lamang sa phonetic error.
Ang iya pangalan nga Leonardo ang halos pareho gid sa Leonard Rodríguez Sepúlveda, isa ka Venezuelan national nga may duha ka mga anak.
Ginpaatahag sang Civil Registry Office nga may problema sa family network system gani nagsala sila sa pag-encode sang pangalan.
Bangud sini, nagaplano si Leonardo nga pasakaan sang kaso ang Civil Registry Office bangud sang kasakit kag pag-antus nga natuga sa iya pamilya sang simple lamang nga phonetic error.
