San-o ka katapusan nga naghibi?
May mga tawo nga palahibi, kag may yara man nga naanad kag natak-an na sa paghibi rason nga hangkilan na sa pagpugong sa pagtulo sang ila nga mga luha.
Apang pinasahi ang kondisyon sang isa ka lalaki didto sa China.
Sang nagligad nga tuig, na-obserbahan sang lalaki nga si Mr. Zhang nga indi niya mapunggan ang iya nga luha kun siya ang magkaon ukon mag-usap sang pagkaon.
Sang una, daw okay pa man, tubtub nga naglala na kag nahuya na ini mag-dine in sa mga restaurant bangud nagakatingala ang mga tawo sa palibot kun ngaa wala untat ang iya hibi samtang nagakaon.
Bangud sa epekto sini sa iya nga social life, nagpa-konsulta si Mr. Zhang sa ophthalmologist kag didto nahibaluan nga may yara siya sang medical condition nga gamay lang nga mga tawo sa kalibutan ang nagasuprer.
Ginatawag ini nga “crocodile tear syndrome” ukon “Bogorad syndrome”.
Antes sini, naatake sang Bell’s Palsy si Mr. Zhang kag amo ini ang ginatudlo rason sang iya nga crocodile tear syndrome.
Suno sa mga doktor, bangud sa face paralysis sadto ni Mr. Zhang, nag-angkon sang abnormality ang lacrimal glands niya sa mata.Ang lacrimal glands ang parte sang mata nga amo ang nagapa-guwa sang luha sang tawo.
Bangud sa sini nga abnormality, na-stimulate kag nagaguwa ang luha sa lacrimal glands kun makasimhot ukon makapanabor si Mr. Zhang sang pagkaon ukon ilimnon.
Nagpaidalom na ini subong sa surgery kag subong gina-obserbaran kun makabulig ini sa iya nga kondisyon. ##
