Nakaagi ka man damgo nga nagdaog ka sa lotto? Ukon basi may kilala nga nakadaog na sa lotto?
Sa China, lab-ot sa langit ang kalipay sang isa ka lalaki matapos nakadaog sang malapit sa 220 million yuan ukon P1.76 billion sa lottery.
Ang lalaki amo si alias “Li” nga nagbakal sang 40 lottery tickets balor 80 yuan ukon P640 kada isa sa autonomous region of Guangxi Zhuang.
Palareho lang ang pito ka numero sa kada ticket.
Suno sa report sang South China Morning Post, nag-hit ang tanan nga pito ka numero. Ginpahayag nga tinuig na nga ginatayaan ni Li ini nga mga numero ukon ginatawag na ini nga iya “alaga”. Ini amo ang 2, 15, 19, 26, 27, 29, kag 2.
Bangud sini, nagdangat sa 5.48 million yuan per ticket ang daog ni Li ukon 220 million yuan.
Sang na-hit na ang jackpot sang Oktubre 21, indi na makatulog si Li kag nagsakay ini sa tren padulong sa Nanning pagkaaga mismo.
Nagtinir siya sa hotel sang weekend bangud nahadlok siya nga madula ang iya nga tickets.
Sunod siya nga nagpadulong sa Guangxi Welfare Lottery Distribution Center sa amo nga syudad sang Oktubre 24 agud kuhaon ang iya nadag-an nga kuwarta.
Sang ginhatag na ang cheke, suksok sini ang isa ka cartoon costume nga amo ang popular nga paagi sa China agud nga ma-proteksyunan ang identity sang mga nagadaog sa lottery.
Apisar tuman ang excitement ni Li bangud sa iya nga swerte, nag-desisyon siya nga indi ini pag-isugid bisan kay sin-o. Wala niya gani ini ginsugid pati sa iya nga pamilya!
Paathag sini, nagakabalaka siya nga basi kun isugid niya nga nakadaog siya sa lotto, magtinamad na ang iya asawa kag anak, ukon basi indi na magtuon sa eskwelahan.
Apang sa pagsulundan, dapat nga mangin joint asset ni Li kag sang iya nga asawa ang amo nga kuwarta. May abogado man nga nagpahayag nga posible malapas ni Li ang local marriage law kun
lapason sini ang kinamatarong sang iya asawa nga makahibalo tuhoy sa amo nga impormasyon.
Isa lang ang sigurado subong: dal-on ni Li pauli ang 171 million yuan ukon P1.37 billion bangud ginbuhinan pa ini sang buwis kag nag-donate man siya sang 5 million yuan ukon P40 million sa charity.
Sang ginpamangkot kun ano ang iya nga plano sa kuwarta, suno kay Li, planuhan pa niya ini sang maayo. ##
