Agaw-atensyon ang iban nga mga tawo sa dalan ukon sa social media bangud sang disenyo sang face mask nga ila ginasuksok subong nga may COVID-19 pandemic.
Apang wala na siguro sang makapierde pa sa isa ka lalaki didto sa northwest England nga nagpili nga magdala sang man-ug agud himuon nga pangtabon sa baba kag liog!
Ini nga lalaki ang nakit-an nga nagasakay sa isa ka bus sa Salford, Greater Manchester kun sa diin ‘chill’ lang ini nga nagapungko sa salakyan.
Gindumdom sang mga pasahero nga colorful lang ang iya face mask, apang sang ulihi, ginpakamang sini ang man-ug sa handrails amo nga nakibot ang mga kaingod niya sa bus apang sa baylo nga makulbaan, nalingaw man ang iban sa ila.
Ginapiyestahan subong sa social media ang video sang amo nga lalaki nga nagasuksok sang puti nga shirt, jeans, kag makit-an man ang python nga nagaburambod sa iya liog.
Ginkaalarma naman ini sang mga tag-iya sang public utility vehicles sa amo nga lugar bangud delikado ini para sa iban nga mga commuters.
Nahibaluan nga mandatory ang pagsuksok sang face coverings sa pampubliko nga salakyan sa England agud malikawan ang COVID-19 transmission apang ini ang limitado lang sa surgical masks, scarf, ukon bandana. #
