Padayon pa nga ginabulong sa ospital ang lalaki nga naaksidente sa atubang sang Bantayan Beach Resort sa Guimbal, Iloilo sakay sa iya ginamaneho nga motorsiklo.
Ang biktima ang ginkilala kay Rolly Inohado, 57 anyos, taga Pescadores, Guimbal Iloilo.
Sa interview sang Bombo Radyo kay Police Corporal Deogracia Nobleza, imbestigador sang Guimbal Municipal Police Station, iya ginpahayag nga naghalin sa bahin sang Nanga Guimbal ang biktima nga may dala nga isda.
Apang nawigit ang isda nga dala ni Inohado rason nga ginbalikdan niya ini kag nasagairan ang tricycle nga naka-park kag ginapanag-iyahan ni Rex Antibo, 33 anyos kag nagdiretso gilayon sa pagbunggo ang motorsiklo sang biktima sa salakyan nga naka park man sa amo nga lugar.
Nakaangkon sang bali sa tiil si Inohado, may pilas man sa ulo kag sa liog.
