Arestado ang isa ka lalaki sa Barangay Dungon C, Mandurriao, Iloilo City kagab-i, Hunyo 2, bangud sa ginaalegar nga iligal nga pagbaligya sang armas-luthang.
Ini amo si alias Kalbo nga tumandok gid sang Silay, Negros Occidental apang madugay naman nga nagatinir diri sa syudad.
Sa interview sang Bombo Radyo kay Police Captain Melchor Tolentino, iya ginpahayag nga sa operasyon sang City Intelligence Unit, nakuha sa possession sang arestado ang isa ka pistola, may isa ka magazine, kag apat tanan ka bala.
Natigayon ang operasyon paagi sa transaksyon sa pagbakal sang pulis sang pusil sa balor nga P6,500.
Magluwas nga ginatudlo nga nagabaligya sang armas nga wala sang lisensya, may nag-report man sa pulis nga masami nagapinalupok si alias Kalbo.
Natalana ini nga pasakaan sang reklamo nga paglapas sa Republic Act 10591 ukon sa Comprehensive Law on Firearms and Ammunition, amo man sa paglapas sa Commission on Elections (Comelec) gun ban.
Ini nga gun ban nga gin-implementar halin sang Enero 12, 2025 para sa 2025 midterm elections ang magalawig pa tubtub sa Hunyo 11, 2025.#
