Subong nga naga damo na gid ang kaso sang COVID-19 sa bilog nga kalibutan, may mga tawo pa nga ginahimo rason ang nasambit nga balatian agud nga maghimo sang mga butang nga bentaha para sa ila.
Kaangay na lang bala sang 28 anyos nga lalaki sa India nga nagbutig sa iya pamilya nga kuno abi nagpositibo ini sa COVID-19 agud lang nga mabayaan ang iya asawa kag maupod ang iya nga kerida.
Gintawgan mismo ni Manish Mishra ang iya asawa nga ginpabalo nga positibo ini sa COVID-19 kag indi na sini luyag pa nga mabuhi.
Gilayon man nga nagsala-sala ang iya pamilya bangud ginpatay sini dayon ang iya telepono.
Nagpangayo sang bulig ang asawa sa Navi Mumbai Police agud nga makita ang iya bana kag nakig-angot man ini sa mga abyan sang lalaki kag nahibaluan nga may iban nga babaye si Manish sa sulod sang pila na ka tuig.
Bangud sa pagpanikasog sang mga kapulisan, nakit-an nila si Manish sa syudad sang Indore kag ginpapauli balik sa iya nga asawa.
