Ano ang imo batyagon kun nagalakat ikaw sa dalan tapos may tawo nga gulpi lang nagabugno sa imo kag nagadayaw sa imo itsura, sa imo buhok, ukon sa imo panapton?
Mahimo nga maham-ot ang iban, may ara man nga mahuya, may ara man nga mangakig ukon mainsulto — depende kun kilala nila ang tawo nga nagabugno kag kun paano sini ihambal ang iya dayaw.
Apang may isa ka tawo sa Japan nga halos wala na nahadlok kun paano mag-react ang tawo nga iya dayawon, bangud sa pagkamatuod, ginhimo na niya ini nga propesyon.
Gintawag na gani siya nga si Uncle Praise bangud bantog siya nga nagadayaw sa kada tawo nga nagalabay.
Ini nga 43-anyos nga lalaki ang naga-ubra anay sa isa ka kumpaniya sa Tochigi sa Japan, apang na-adik siya sa pagsugal rason nga nadulaan sang trabaho kag sang ulihi, ginbayaan pa siya sang iya pamilya. Nagbalatian pa ang iya amay gani nga wala na siya sang palangitan-an kag napilitan nga sa higad-dalan na lang mag-istar.
Daw namarasmasan siya bangud sa iya naabtan, kag bangud kinahanglan niya maka-survive, ginpinsar sini nga mangin street performer ugaling kay wala man siya sang talent kaangay sang pagkanta kag pagsaot ukon bisan magic tricks.
Sang ulihi, nadumduman niya nga dayawon ang iban nga mga tawo, apang may mga nagapangakig… gani nagdala na lang siya sang cardboard kag nga may nakasulat sang iya pagdayaw sa iban.
Nakatuon man si Uncle Praise nga indi ini pagpasobrahan — halimbawa, kun una nga bes niya nakit-an ang tawo, itsura anay ang iya dayawon, kag kun nasadyahan man ang tawo, makig-istorya na siya kag hibaluon ang iban nga bagay nga sarang niya mahatagan sang compliment.
Tatlo ka tuig na niya ini nga ginahimo kag may pila man nga nanamian gid bangud wala gid sang naga-apresyar sa ila.
Sa pagkamatuod, may mga regular clients pa si Uncle Praise nga nagatawag sa iya kun kinahanglan nila ang morale boost.
Nakalibot naman siya sa 31 sa 47 prefectures sang Japan para sa sini nga unique nga trabaho kag nakadayaw sang masobra 30 ka tawo kada adlaw kag may income nga 10,000 yen.
