ILOILO CITY – Magapangatubang sang kaso may kaangtanan sa illegal possession of firearms ang isa ka lalaki matapos nga nakuhaan sang indi lisensyado nga armas sa checkpoint nga ginpatigayon sang Maasin Municipal Police Station sa Barangay Naslo sa amo nga banwa.
Ang nakuhaan sang armas amo si Marvin Mandario, 27, residente sang Barangay Tulahong sang amo man nga banwa.
Nakuha sa iya ang homemade 12 gauge shotgun ukon sulpak nga may isa ka bala kag wala sang serial number.
Sa interview sang Bombo Radyo kay Police Captain Richard Lao, hepe sang Maasin Municipal Police Station, iya ginpahayag nga ginparahan nila si Mandario nga nagasakay sa motorsiklo kag nakita nga may nagabukol sa iya kilid.
Sang ginkapkapan, didto na kag nakuha ang armas.
Yara na sa kustodiya sang Maasin PNP si Mandario kag maga-pangatubang sang kaso nga paglapas sa Republic Act 10591 ukon illegal possession of firearms.
