May mga lugar nga istrikto gid ang pagsulundan pag-abot sa tattoo sa lawas, pagsuksok sang aritos, ukon mangin ang istilo kag color sang buhok.
Apang may mga kaso naman nga indi lang basta-basta, kag nagalab-ot pa sa punto nga makasuhan kag mamultahan bangud sa sini nga mga bagay.
Kaangay sa sining natabo sa 25-anyos nga si Stanislav Netesov sa Russia nga nagpa-color sang iya nga buhok sang yellow kag blue nga natabuan man nga amo ang color sang flag sang Ukraine nga amo subong ang gina-atake sang Russian Army.
Sang nagligad lamang nga semana, isa ka gab-i, samtang yara si Netesov sa bus stom sa Moscow, na-biktima siya sang kawatan, nadagit ang iya nga cellphone, kag natapungulan pa ini sang suspek.
Pagkasunod nga adlaw, nagkadto siya sa Ministry of Internal Affairs sa Tverskoy district agud nga i-report ang krimen.
Apang sa baylo nga hatagan siya sang bulig, mas interesado ang otoridad sa iya bangud sa iya nga buhok nga kaangay gid sa color sang flag sang Ukraine.
Bangud nga ginakonsiderar ini nga simbolo sang Ukraine, makabig man ini nga insulto kag pagtraidor sa Russian army kag may penalidad sa idalom sang layi sa amo nga nasyon.
Bangud sini, wala na nasapak ang iya nga report kag sa baylo, ginkuhaan pa siya sang fingerprints kag ginpakadto sa military registration kag enlistment office. Gindeklarar pa sang otoridad nga pahalukon ini sa duta.
Nahibaluan nga ginakilala sang Russian courts ang mga anti-war statements nga isa ka pagbastos sa militar kag dapat nga multahan sang tubtub sa tubtub sa malapit P31,000 kag tubtub naman sa lima ka tuig nga pagkapreso kun sulit-sulit na nga madakpan.
Sang nagligad nga summer, may yara man sang kaso sa Penza kun sa diin namultahan man ang isa ka pensioner sang P62,000 bangud sa pag-like sini sang social media post kun sa diin may negatibo nga komento batok sa Russian military.#
