SAN JOSE, ANTIQUE – Patay ang lalaki sa Maybato North San Jose Antique matapos nga ginpaarakan luthang sang riding in tandem suspects.
Sa exclusive interview sang Bombo Radyo kay Agent Scorpio, iya ginpahayag nga samtang papuli ang biktima nga si Bonny Sanchez padulong sa ila balay sa Poblacion 2, Hamtic, Antique, may yara sang duha ka mga lalaki sakay sa motorsiklo ang nagasunod sa iya.
Suno kay Agent Scorpio, wala pa makalab-ot ang biktima sa ila nga balay sang gilayon siya nga ginpaarakan sang luthang sang riding in tandem suspects.
Ang mga riding in tandem suspects ang nakasuksok sang helmet ang driver samtang naka bonet namana ang angkas sini.
May yara sang duha ka igo sa dughan ang biktima, igo sa tiyan, dalom sang iya pusod, paa kag likod ngabahin sang iya nga lawas.
Sang natumba na si Sanchez sa iya nga motorsiklo, gintinguhaan pa niya nga makadalagan palayo sa duha ka mga lalaki apang ginlagas pa siya sang lalaki nga naka bonet kag ginluthang na naman sa liwat.
Dugang pa sang natungdan, nakit-an sa dalan ang 12 ka mga empty shells kag isa ka bala nga wala maglupok lunsay iya sang caliber 45 kag 9mm nga armas.
Padayon pa nga gina-imbestigahan sang mga kapulisan ang posible motibo sa pagluthang patay sa biktima.
