Ginatugyan na lang kay Iloilo City Mayor Jerry Treñas ang desisyon kun ano nga silot ang ipapanaug batok sa isa ka resto bar sa Smallville Complex sa distrito sang Mandurriao nga makaduha na ka beses nga nadakpan nga nagaserbe sang makahulubog nga ilimnon.
Sa interview sang Bombo Radyo kay Nestor Canong, pinuno sang Task Force on Morals and Values Formation, iya ginpahayag nga una na nga nadala ang Lanai Grill sa 20 ka mga business establishments nga ginserbehan sang closure order sang nagligad nga semana bangud sa paglapas sa Executive Order 187.
Suno kay Canong, sang natapos na ang five-day time period sang pagpasirado kag sang ginpadulungan sang compliance team ang amo nga establisemento agud nga kakson ang tarpaulin sang closure order, liwat ini nga nadakpan sa akto nga nagabaligya kag nagaserbe sang liquor.
Ginpahayag ni Canong nga mismo ang mga hubog nga customer ang nag-ako nga nag-order sila kag ginserbehan sang makahulubog nga ilimnon sang nagabantay sa resto bar. Yara sa tago nga bahin sang resto bar nagpungko kag nag-inom ang mga customer suno kay Canong.
“Ginpasa na ang report kay Mayor kag bahala na ang alkalde nga magbinag-binag kun ano nga pamatbat sa sining Lanai Grill. Kay Mayor na ang poder nga magpasira sini ukon ano man ang iya nga desisyon,” pahayag ni Canong.
