ILOILO CITY – Madamo sang food trends ang mahimo subong nga Enhanced Community Quarantine.
Ini ang ginpamatud-an sang land-based employee sang isa ka shipping company nga si Joey Infante nga sa subong nagapabilin sa Pasig City matapos nga temporaryo nga ginpauntat ang ila trabaho.
Sa Good Morning Philippines program, ginpakigbahin ni Infante ang iya self-made recipe kun sa diin ang main ingridient amo ang canned food kasubong sang tuna, mackerel kag sardinas.
Suno kay Infante, bangud nga sirado ang mga balaklan kag limitado ang pagbukas sang grocery stores, kalabanan ang nagasalig na lang sa canned foods.
Isa sa simple nga recipe nga iya nahimo subong nga quarantine amo ang canned tuna patty with string beans kun sa diin lakip sa ingridients amo ang canned tuna, ginpino nga ahos, bombay kag balatong, itlog, harina, asin, kalamay, lemon ukon kalamansi agud nga makuha ang langsa kag mahimo man nga dugangan sang sili para naman sa mga mahilig sa spicy ukon makahang.
Nagakadapat nga kuhaon ang sabaw sang canned tuna agud nga mag-mix sang maayo ang tanan nga ingridients sa pagahimuon nga patty.
Samtang ginahanda ang ingridients mahimo na nga painiton ang mantika sa kalaha antes ibutang ang ginhulma nga patty kag pritihon ini tubtub nga maluto.
Sa pihak sang kabudlay, ang pandemic suno kay Infante ang nagtulod sa mga Filipino nga magbinuligay kag mangin madiskarte sa pagpangabuhi.
