Ginpaidalom sa 90 ka adlaw nga suspension sang Land Transportation Office (LTO) ang lisensya sang driver matapos ang makasulubo nga aksidente sa Ninoy Aquino International Airport (NAIA).
Ang nasambit nga Insidente ang nagresulta sa kamatayon sang duha ka indibidwal kun sa diin ginalakipan sang isa ka 28-anyos nga lalaki kag isa ka 5-anyos nga bata, kag duha naman ka mga tawo ang nasamaran kag gindala sa ospital.
Suno sa Anti-Drunk and Drugged Driving Act of 2013, ang mga driver nga involved sa mga aksidente ang nagakinahanglan magpa-chemical test, lakip na ang drug screening test kag kun kinahanglan, drug confirmatory test agud masiguro nga wala sila sang alcohol ukon ilegal nga droga sa ila sistema.
Ginpasiguro ni Assistant Secretary Vigor Mendoza II nga nag-issue na sila sang show-cause order batok sa rehistrado nga driver.
Dugang pa niya, ginahingyo man ang driver nga i-surrender ang iya lisensya sa pinakamadali nga panahon.
Base sa report sang mga otoridad, gintu-ad sang driver nga ginpaandar niya ang iya salakyan matapos nga nagpanaog ang pasahero sang gulpyada nga may naglabay nga salakyan sa atubang niya rason nga nagtuga ini sang aksidente.
Sa pihak nga bahin, ginsiling ni Department of Transportation Secretary Vince Dizon nga wala sang intensyon ang driver nga maaksidente, kun sa diin nagdul-ong lang kuntani ini sang pasahero sa Airport.
Pahayag pa ni Dizon, nagapadayon pa sila sa pagtan-aw sang iban nga Angulo sang CCTV footage, kag magapadayon man ang drug testing sa nasambit nga driver
Suno sa New NAIA Infrastructure Corp. (NNIC), nagapadayon ang ila imbestigasyon kaupod ang Philippine National Police (PNP) kag Manila International Airport Authority (MIAA) Security.
Sa subong, ang operasyon sa Departure Area nagbalik na sa normal, kag ang mga nasamaran gintagaan sang bulig medical.
