ILOILO CITY – Posible nga madugangan pa ang lantay ukon balsa nga ginagamit sang mga pumuluyo agud makatabok sa suba samtang nga ginakaayo ang Monfort Bridge sang Dingle, Iloilo.
Sa interview sang Bombo Radyo kay Vice Mayor Quindialem Villanueva, iya ginapahayag nga may yara sang ginaobra ang mga pumuluyo nga dugang nga lantay agud mas mapadasig pa ang pagpatabok sa mga tawo ilabi na sa mga estudyante.
Suno kay Vice Mayor Villanueva, yara man ang mga barangay officials nga nagabantay sa lugar agud masiguro ang seguridad sang mga kabataan.
Sa pagkamatuod, sang nautod ang Monfort Bridge, naghingyo ang bise alkalde kay Iloilo Governor Arthur Defensor, Jr. kun mahimo mapondohan anay ang hanging bridge agud nga may malabayan ang mga motorsiklo kag natigayon man ini kun sa diin, nagapadayon ang pagkaayo sang hanging bridge.
Apang ang hanging bridge ang mas malayo kun ipaanggid sa Monfort Bridge .
Kun sa balsa sa idalom sang Monfort Bridge malabay ang mga estudyante, maka-save sila sang gasto bangud nga mas malapit sa town proper kag sa eskwelahan.
Ang ginakabalak-an dugang ni Vice Mayor Villanueva amo ang pagbukas sang trampa sang National Irrigation Administartion Region VI bangud nagataas ang lebel sang tubig kag nagabaskog ang daludo sini.
Sang damlag lang, sang nagbukas ang trampa sang dam, ang pile nga ginahimo sang contractor ang na-wash out.
Pahayag sang natungdan, mas maayo kun may yara sang coordination sa National Irrigation Administartion Region VI kag Department of Public Works and Highways ang contractor nga A.D. Pendon Construction and Supply, Inc.
Ang mga barangay captains ang nag-request na sa ahensya nga buksan ang gate sang dam sa specific timings nagikan sa 5;30 AM- 8:00 AM kag 4:30 PM – 6:30 PM antes kag pagkatapos sang repair work.
