ILOILO CITY – Ginakabig nga pinakadako nga problema ang lapnagon nga pagbaha sa bilog nga Western Visayas sa tion nga mag-ulan.
Sa interview sang Bombo Radyo kay Office of Civil Defense (OCD) Region 6 Director Jose Roberto Nuñez, iya ginpahayag nga kinahanglan na nga kay-uhon ang river system sa rehiyon.
May yara na sang gin-propose nga Panay River Basin sa bahin sang Capiz, Aklan, Antique kag Negros Occidental nga halos kumpleto na apang wala pa sa gihapon natigayun ang pagpatindog sini.
Dugang pa niya, kinahanglan ang bulig sang nagkalain-lain nga ahensya sang gobyerno agud nga malikawan ang lapnagon nga pagbaha.
Ang mga ahensya sang gobyerno nga makabulig diri amo ang Department of Environment and Natural Resources (DENR), Department of Public Works and Highways (DPWH), National Irrigation Administration (NIA) sa idalom sang Department of Agriculture (DA), Department of Energy (DOE) kag Department of Tourism (DOT) nga magabug-os sa technical working group.
Sa subong, padayon ini nga ginatun-an sang National Economic and Development Authority (NEDA) kag Regional Developent Council (RDC).
Dugang pa ni Nuñez, P22 billion ang budget sa tagsa ka proyekto nga makabulig na sa paglikaw sang baha, makabulig pa sa turismo kag enerhiya sang lugar.
