ILOILO – Duha ang patay sa Western Visayas bangud sang pagkalunod kadungan sang tatlo ka weather disturbances sang nagligad nga Disyembre 2 nga amo man ang nagtuga sang lapnagon nga pagbaha.
Santo sa record sang Office of Civil Defense (OCD) Region V1, ang mga napatay amo ang 25 anyos nga lalaki sa President Roxas, Capiz; kag 16 anyos nga lalaki sa Barangay Salngan, Passi City, Iloilo.
Missing man tubtob subong ang 50 anyos nga lalaki sa Maayon, Capiz.
Sa interview sang Bombo Radyo kay Ma. Aletha Nogra, chairperson sang Disaster Risk Reduction Managenent Division sang Office of Civil Defense Region VI, iya ginpahayag nga kumpirmahon man sang talatapan ang report nga may yara man sang drowning incident nga ginaalegar natabo sa Barangay Del Castillo sa banwa sang Sara.
Santo sa initial data sang pamunuan, 25 tanan ka mga barangay ang apektado sa Western Visayas. Ini nga mga barangay ang ginabug-usan sang 1,257 ka mga pamilya ukon 4,656 ka mga indibidwal.
Sa Capiz, may narekord man nga mga pagbaha nga naglapaw pa sa mga talamnan kag may yara sang mga indi maagyan nga mga dalan.
Sa Iloilo, una na ginpahayag sang Provincial Disaster Risk Reduction and Management Office nga 15 ka mga barangay ang halos nasul-ob sang tubig sang amo nga tion.
