Nasapwan ang isa ka lapsag nga naga-utaw-utaw sa Barangay Ortiz, Iloilo City Proper sini gid lamang nga hapon, Septyembre 4.
Sa interview sang Bombo Radyo kay Monica Dela Vega, heath aide sa barangay, iya ginpahayag nga sang nasiplatan ang lawas kag ginkadtuan na ang area, nakit-an pa nila nga may isda nga nagatulod sa lapsag pahigad sa baybay.
Suno sa iya, nagkuha sang sarap ang isa nila ka barangay kagawad agud nga makuha ang bata, kag sang ulihi, ginlumpatan pa gid sang barangay tanod agud nga maluwas kuntani ini.
Ginpahayag sini nga kumpleto na ang mga parte sang lawas sang bata kag kumpirmado nga isa ini ka lalaki. Ginabanta nga anum tubtub pito ka bulan ang edad.
Hublas ini sang nakit-an kag nagalutaw-lutaw lang sa tubig.
“Kun sin-o ka man, ang nanay sang bata nga ni, baw maluoy ka man day! Daw wala ka gid konsensya,” suno sa health aide.
Wala pa sang ideya ang barangay kun sin-o ang iloy sang biktima.
Yara subong ang lapsag sa barangay kag natalana nga pa-misahan. Nag-abot naman ang SOCO para sa imbestigasyon.#
