Nagpalab-ot sang pagpakig-unong si Canadian Prime Minister Mark Carney sa Filipino community nga nadulaan sang mga pinalangga sa kabuhi bangud sa trahedya nga natabo kadungan sang Lapu-Lapu Day Festival.
Sa amo nga insidente nga natabo 8:00 sa gab-i local time, 11 na patay kag masobra 20 ang pilason.
Suno sa prime minister, isa ka malain nga damgo ang na-eksperyensayahan sang mga pamilya nga nadulaan sang utod, amay, iloy, ukon bata bangud sa amo nga insidente.
“Last night, families lost a sister, a brother, a mother, a father, a son or a daughter. Those families are living every family’s nightmare,” pahayag sini samtang yara sa Hamilton, Ontario. “I join all Canadians in mourning with you. I know that Canadians are united with you.”
Apisar nga tuman na ang pagsakuay para sa national election, gin-ilisan man ni Carney ang iya nga campaign events agud magpalab-ot sang pagpakig-unong.
Ginkanselar man ang dalagku nga rallies sang linibo ka supporters sa Calgary kag sa Richmond, British Columbia agud nga maghatag sang pagtahod sa Filipino community nga pinakaapektado sa trahedya.
Si King Charles, head of state sang Canada, ang nagpaguwa man sang statement nga siya kag ang iya asawa nga si Queen Camila ang nagaupod man sa kasubo sang Filipino community. Nagpalab-ot man ini sang simpatiya sa tanan nga naapektuhan sang trahedya.
“Both my wife and I were profoundly saddened to learn of the dreadful attack and utterly tragic loss of life in Vancouver, which took place as the Filipino community came together to mark the celebration of one of their most special festivals,” kabahin sang statement sang hari. “Our hearts and prayers go out to all those whose lives have been shattered by such a desperate tragedy and we send our deepest possible sympathy at a most agonizing time for so many in Canada.”#
