Nag-boluntaryo si Presidential Adviser for Poverty Alleviation Larry Gadon nga mangin referee pananglitan madayon ang “charity boxing match” sa tunga nanday Philippine National Police (PNP) chief Gen. Nicolas Torre III kag Davao City acting Mayor Baste Duterte.
“I’m worried that Gen. Torre might inflict a catastrophic injury on Baste. ‘Yan si Gen. Torre, astig ‘yan, meron iniinom ‘yan na energy drink na coffee,” pahayag ni Gadon.
Dugang sini: “Ayoko naman na magkaroon ng serious injury dahil ito naman ay isang sports game lamang.”
Nagapati man ang opisyal nga maayo ang tuyo kun himuon nga charity ang pag-atubangay sang police chief kag anak ni former President Rodrigo Duterte.
“Willing ako mag-volunteer na referee upang mabilis kong maawat saka-sakaling magkaroon na ng sakitan,” pahayag pa sini. “Referee Larry Gadon!”
Nag-ugat ini sa paghangkat ni Baste kay Torre nga magtapungulay sila — bagay nga ginkagat sang police official kag nagsabat nga mahimo sila mag-atubangay sa “charity boxing match” sa Araneta sa Domingo.
Umpisa sadto, naguwa na ang videos nga nagahanas na sa boksing ang PNP chief.
Nagplastar naman sang iya mga kondisyon si Baste kag nagpahayag nga dapat anay nga magpaidalom si President Ferdinand Marcos Jr. sa hair follicle drug test.
Dapat man suno kay Baste nga magpaidalom man sa drug test ang tanan nga elected officials; kag kun makumbinse ni Torre si Marcos nga imandu ini, batunon na sini ang hangkat para sa boksing.
Sa bahin sang Palasyo, nagpalab-ot naman sang “Good Luck” message si Palace Press Officer Claire Castro pananglitan madayon gid man ang sambuwa.#
