Ginatudlo ang late coordination sa mga traffic enforcers bilang posible nga rason kung ngaa wala na-flashing ang traffic light sang paglabay sang tatlo ka VIP van sa Barangay Taft North, Mandurriao, Iloilo City, gab-i sang Oktubre 6.
Ini matapos wala nagpondo ang mga VIP van sa signalized intersection bisan pula ang traffic light, samtang nagapakadto sa airport kag ginapahayag gin-escort sang Iloilo City Police Office (ICPO).
Sa interview sang Bombo Radyo kay Iloilo City Traffic and Transportation Management Office (ICTTMO) Head Retired Colonel Uldarico Garbanzos, iya ginpahayag nga may mga tion nga ginahatagan sang prayoridad ang mga VIP convoy, ilabi na kung ginalagas ang oras kag nagapadulong sa airport.
Suno kay Garbanzos, na-obserbahan sang mga traffic enforcers ang convoy sang tion sang naglabay ini, apang posible nga wala mabatian rason nga naulihi ang koordinasyon.
Dugang pa niya, magahod ang sitwasyon sang lugar kag sa kasakoon sa pagmaniobra sang traffic posible nga wala naka-on ang radyo ukon cellphone.
Samtang, ginahulat pa niya ang dugang nga pahayag sang ICPO para mahatagan sang klaro nga detalye kung ano gid ang natabo sa pag-convoy sang VIP van kag kung paano ginpatuman ang traffic assistance sa amo nga tion.
Ginpahayag ni Garbanzos nga sa amo nga mga sitwasyon, importante ang proper coordination sa mga intersection agud mahatagan sang prayoridad ang mga VIP convoy, samtang mapabilin man nga matawhay kag luwas ang pagdalagan sang trapiko.
Apang, iya man ginklaro nga indi convoy sang Iloilo City Government ang nasambit nga van.
