Ginkumpirma sang Department of Health (DOH) nga napapauli na sa ila balay ang pasyente nga amo ang una nga nakumpirma nga nag-positibo sa mpox sa Pilipinas kasunod sang pagdeklarar sang World Health Organization (WHO) nga isa ka public health emergency ang amo nga balatian.
Suno sa ahensya, nakumpleto naman subong ang contact tracing.
Ginkumpirma man sang talatapan nga matahaw nga Clade II variant ang kaso sang amo nga 33-anyos nga Filipino patient.
Base sa nauna nga statement sang DOH sang tion nga nakumpirma ang mpox case, ginpahayag nga nahilanat ang pasyente kag may rashes sa nawong, likod, likod sang liog, lawas, palad, kag iban pa nga parte sang lawas.
Talalupangdon nga wala sang history ang pasyente nga naka-byahe ini sa luwas sang pungsod nga nagakahulugan nga diri sa Pilipinas naghalin ang virus kag indi ini imported rason man kun ngaa una na nagpaandam ang health department sang possible matabo nga community transmission.
Sa subong, suno kay Health Secretary Teodoro Herbosa, wala pa sang confirmed cases sa Pilipinas sang clade Ib ukon ang bag-o nga strain nga amo ang ginatudlo nga responsable sa outbreak sa Africa kag amo man ang na-report nga kaso sa Sweden kag Thailand.
Ginaproseso na subong sang gobyerno suno kay Herbosa ang pag-secure sang 2,000 ka doses sang mpox vaccines agud malikawan na ang paglapta sang amo nga balatian.
Ang mpox isa ka balatian nga tuga sang monkeypox virus.
Una ini nga na-rekord sa mga amo sang 1958 kag ang una nga transmission sang virus sa tawo ang natabo sang 1970.
Mahimo maglaton ang balatian paagi sa direct contact sa body fluids ukon skin-to-skin contact. Lakip sa sintomas sini amo ang skin rash ukon mucosal lesions nga ginaupdan pa sang fever, headache, muscle aches, back pain, low energy, kag swollen lymph nodes.#
