Gin-report sang Armed Forces of the Philippines (AFP) subong nga adlaw, Septyembre 27, nga nakumpleto sini ang rotation and resupply mission para sa BRP Sierra Madre sa Ayungin Shoal apisar may nakit-an nga mga barko sang China sa palibot.
Suno kay AFP spokesperson Colonel Francel Margareth Padilla, walo ka nagkalain-lain nga Chinese vessels ang yara sa vicinity sang Ayungin apang wala ini nagpanghilabot sa misyon kag sa mga personnel sang Pilipinas.
Ginpatigayon ang military mission kahapon, Septyembre 27, sa bulig sang Philippine Coast Guard apang wala pa sang dugang nga mga detalye nga ginpaguwa.
“AFP was able to deliver supplies and rotate our personnel without interference. We remain vigilant and prepared to respond to any challenges in protecting our personnel and operations,” dugang ni Padilla.
Nag-post man sang video clip ang AFP kun sa diin nakit-an nga nagapalapit ang MV Lapu-Lapu sa BRP Sierra Madre samtang nagahulat naman ang tropa.
Isa ka World War II-era ship ang BRP Sierra Madre nga nagabantay sa Ayungin Shoal halin pa sang 1999 sang nagsugod ang China sa pag-reclaim kag pagtukod sang mga estruktura malapit sa Mischief Reef.
Apisar daan na kag tuktukon, wala gid ginpahalin ang amo nga barko sa Ayungin Shoal sa sulod sang masobra duha ka dekada. Isa ini sa pila ka Philippine outposts sa West Philippine Sea nga sulod sa exclusive economic zone (EEZ) sang pungsod.
Nahibaluan nga ang resupply missions sa amo nga barko ang masami ginabalabagan sang China bangud gina-insister nila nga kabahin ang Ayungin sa ila teritoryo. Sulod ang Ayungin Shoal sa EEZ sang Pilipinas bangud nahamtang ini sa distansya nga 105 nautical miles halin sa coastline sang pungsod.#
