Ginpatpat sang eksperto sa layi ang mga nagakadapat himuon kun ang isa ka tawo ang nagaplano nga mag adopt sang isa ka bata.
Ini ang kasunod sang pagpirma ni Presidente Rodrigo Duterte sang Republic Act No. 11222 or the Simulated Birth Rectification Act nga nagapadasig sa proseso sang adoption.
Sa interview sang Bombo Radyo Iloilo kay Atty. Elica Degracia Fuentes, iya ginpahayag nga ang adoption ang isa ka socio-legal nga proseso nga nagahatag sang permanente nga pamilya sa isa ka bata nga mahimo ma-adopt kag gin-abandona sang isa ka ginikanan.
Ang isa sa importante nga tinutuyo amo ang paghatag sang kun ano ang mas makapamaayo sa isa ka bata.
Mahimo naman nga ma adopt ang isa ka bata nga 18 anyos panubo ukon pataas nga wala sang ikasarang nga magprotekta sa iya kaugalingon kag nagakinahanglan sang pag giya sang mga mas may edad sa iya.
Ang isa ka persona nga luyag mag-adopt sang bata ang nagakadapat nga mas gulang sang 16 anyos sa bata nga paga-adoptarun; may kapasidad nga himuon ang responsibilidad sang isa ka adoptive parent kag makabalo maghatag sang pagpalangga, pag-ulikid kag suporta sa isa ka bata.
Kun ang luyag naman nga mag adoptar sang bata ang isa ka foreigner, nagakadapat nga may yara ini sang sertipikasyon nga kwalipikado ini mag-adoptar sang isa ka bata sa iya ginhalinan nga pungsod, kag ginapahanugutan sa ila pungsod ang pagpasulod sa adaptee nga makatiner sang permanente sa balay sang nag-adopt sa iya.
Kun ang pag-adopt ang ginpaagi naman sa administrative nga pagi, nagakapadapat nga magtambong ang isa ka adoptive parent sa forum sang Department of Social Welfare and Development (DSWD) agud mahibaluan kun ano ang epekto kag konsekwensya sang pag-adopt sang bata, dapat handa siya sa emosyonal nga aspeto kag may kapasidad pinansyal agud suportahan ang kinahanglanon sang bata.
Sa domestic adoption nagakadapat nga magkuha sang consent sa mga ginikanan sang bata kun buhi pa ang mga ini samtang kun patay na nagakadapat nga magkuha ang maga-adopt sang death certificate sang biological nga ginikanan lakip na ang medical kag health profile sang bata.
Kun ang isa ka mag-asawa ang nagaplano nga mag-adopt nagakadapat nga magpakita ang mga ini sang ila marriage contract.
Pagkatapos sang tanan nga requirements maga-file naman sang petition sa pag-adopt sa korte kun sa diin may yara sang mga ginapatigayun nga hearings.
Nagpanugyan man ini sa mga tawo nga luyag mag-adopt nga indi ang mga ini magkahadlok bangud sila bilang mga abogado ang handa gid sa paggiya kun ano ang nagakadapat nga himuon agud mangin legal ang adoptation sang bata.
Indi naman magnubo sa P80,000 ang gastuhon sa tion nga mag adopt sang bata.
