Nagapati ang isa ka law expert nga indi lang sa Kamara posible makaapekto ang mga tinaga nga ginbuy-an ni former President Rodrigo Duterte sa pinakaulihi sini nga pagpakigbahin sa Quad Com hearing, kundi pati man sa Senado.
Ini kasunod man sang pahayag sang anay presidente nga responsibilidad sini ang tanan nga natabo sa war on drugs sa iya administrasyon.
Sa interview sang Bombo Radyo kay Atty. Joenar Pueblo, Bombo Abogado, iya ginpahayag nga ang mga ginabuy-an nga tinaga sa hearing ang ‘under oath’ ukon ginsumpaan.
Suno kay Pueblo, tanan nga ginpanghambal ni Duterte ang recorded kag mahimo nga magamit man bilang ebidensya batok sa iya sa isa ka prosecution.
Ginpahayag man sang natungdan nga may mga na-convict na sa pagsulod sang International Criminal Court (ICC) sa pila ka pungsod sa kalibutan, apang masami sila nga nagadaog sa kaso kon ang isa ka pungsod, pigado.
Una na nga nagpabutyag ang ICC nga imbestigaran ang ginapahayag extra judicial killings nga nagakatabo sa Pilipinas sa idalom sang ‘war on drugs’ sang Duterte administration.
Apang, paagi sa mando ni Duterte, gilayon nga nagbulag ang Pilipinas sa Rome Statute sang Marso 2019 agud indi makasulod ang ICC sa pungsod.
Ginaimbestigaran naman subong sang ICC si Duterte kaangot man sa maduguon nga kampanya sini batok sa iligal nga droga.
