STA. BARBARA, ILOILO – Wala pa sa gihapon makita tubtub sa subong ang 12 anyos nga bata nga lalaki nga nalunod sa suba sa Brgy. Talongadian, Sta. Barabara, Iloilo.
Sa interview sang Bombo Radyo kay Police Major Raymond Celoso, hepe sang Sta. Barbara Municipal Police Station, iya ginpahayag nga nakalab-ot na ang search and retrieval team sa boundary sang Pavia kag syudad sang Iloilo apang wala sa gihapon nakita ang bangkay sang biktima nga si Modesto Sobreviva.
Suno kay Celoso, mahimo nga na-trap sa gikab ukon natabunan sang rurok ang lawas sang biktima bangud nga ang bangkay ang magalutaw sa sulod sang 12 ka oras.
Ginpahayag ni Celoso nga ginaduso sa subong nga buksan ang Mini Dam sa banwa sang San Miguel agud nga magsaka ang water level sa suba kag may posibilidad nga maglutaw ang bangkay.
Sang damlag lang, nasapwan na ang bangkay sang 5 ka tuig nga si Mary Grace sa Brgy. Pal-Agon sa Sta. Barbara.
Nahibaluan nga natabo ang insidente kun sa diin naga-harvest sang talong kag okra ang amay upod ang lima ka niya ka kabataan.
Ginapahayag nga nadalin-as kag nahulog sa suba si Mary Grace kag gilayon man nga naglukso si Modesto agud salbaron ang iya manghod apang duha sila ang gin-anod sang tubig.
