𝗖𝗔𝗣𝗔𝗦, 𝗧𝗔𝗥𝗟𝗔𝗖 — Nakit-an na sang otoridad ang bangkay sang magkahagugma nga sanday beauty queen Geneva Lopez kag sang Israeli fiancé sini nga si Yitzhak Cohen sa Barangay Sta. Lucia, Capas, Tarlac.
Ini kasunod man sang paghukay sang Scene of the Crime Operatives (SOCO) sang naga-agnas na nga bangkay sang lalaki kag babaye sa isa ka quarry site sa nasambit nga lugar.
Suno kay Police Lieutenant Colonel Librado Manarang Jr, hepe sang Capas Municipal Police Station, iya ginpahayag nga gin-identify sang mga himata ni Lopez kag Cohen ang lawas nga nasapwan sang kapulisan bangud man sa ginpahayag sang key witness sang amo nga kaso.
Ginpahayag man sang natungdan nga magpatuman sila sang dugang nga imbestigasyon lakip na ang autopsy agud madetermina ang gintunaan sang ila kamatayon.
Mapatuman man sang DNA testing ang otoridad sa mga nasapwan nga lawas.
Nahibaluan nga si Lopez kag Cohen ang ulihi nakit-an sang Hunyo 21 nga nagasakay sa SUV padulong sa Tarlac agud magpatuman sang transakyon sang duta sa amo nga probinsya.
Santo naman sa imbestigasyon sang kapulisan, ulihi nakit-an ang SUV sa Barangay Cristo Rey, Tarlac, nga ginsunog pa antes nga gin-abandona.
Gintumod naman sang Philippine National Police (PNP) nga may pito ka mga person of interest sa kaso, lakip ang middleman ukon agent sang propedad nga baklon kuntani sang magkahagugma.
Una na nga nagpadulong ang pamilya sang mga biktima sa National Bureau of Investigation (NBI) agud nga magpangayo sang bulig matapos na-missing si Lopez kag Cohen.
Matandaan nga ang Criminal Investigation and Detection Group (CIDG) ang una nagtul-id nga sa pito ka mga person of interest, ginaalegar nga lakip diri ang duha ka police officers kag ang real estate middleman.
