Nasapwan na pasado ‘las tres subong nga hapon ang lawas sang isa ka missing nga crew member matapos naglugdang sa Bataan ang isa ka motor tanker nga pakadto kuntani sa Iloilo.
Suno sa update sang Philippine Coast Guard, ang barko sini nga BRP Melchora Aquino amo ang nakasapo sa bangkay sang tripulante.
“As of 3PM today, 25 July 2024, the BRP Melchora Aquino (MRRV-9702) has located the body of the missing crew of MT Terra Nova in the vicinity waters off Limay, Bataan,” pahayag sang PCG.
Halin ang MT Terra Nova sa Bataan kag naglugdang 3.6 nautical miles sa nasidlangan sang Lamao Point sa Limay pasado ‘la una kaina sang kaagahon.
Una nga gin-report sang PCG nga 16 sa 17 ka crewmen ang sakay sa vessel ang na-rescue kun sa diin apat diri ang nag-require sang medical attention.
Karga sang amo nga 498-ton tanker ang 1.4 million liters sang industrial fuel sang natabo ang insidente apang indi pa subong klaro kun ano gid ang rason sang paglugdang.
Ginkumpirma man sang otoridad nga may na-monitor nga oil spill sa 5.6 nautical miles nasidlangan sang Lamao Point nga may estimated coverage nga two nautical miles.
Sandig sa report sang PCG, may gin-deploy nga marine environmental protection personnel kag tatlo ka PCG vessels para magbulig sa oil spill response operation.
