ILOILO CITY – Tion na agud nga butangan sang ngipon ang mga layi may kaangtanan sa Child Protection agud nga matapna ang nanari-sari nga child abuse.
Ini ang may kaangtanan sa pagsaulog sang National Awareness Week for the Prevention of Child Sexual Abuse and Exploitation sa ika duha nga semana sang Pebrero.
Sa Good Morning Philippines program, ginpahayag ni Japhet Grace Moleta, Advocacy Coordinator sang Cameleon Association Inc., nga mangin wala sang pulos ang layi kun wala ini napatuman sang husto.
Suno kay Moleta, kun basehan ang reported data sa Western Visayas, naglab-ot sa 183 ang reported cases sang 2018 kun rape ang pagahambalan samtang nagtaas ini sang nakaligad nga tuig sa 198.
Ginpahayag ni Moleta nga nagakahulugan lamang ini nga epektibo ang kampanya agud nga engganyuhon ang publiko nga i-report ang mga nagakatabo nga rape kag iban pa nga sahi sang pagpang-abuso apang mas makapaayo suno sa natungdan kun wala na sang may matabo nga child abuse.
Indi lamang ang mga babayi suno kay Moleta ang biktima sang child abuse kundi lakip man ang mga lalaki rason nga ginaduso sang mga grupo nga nagatib-ong sa child rights and protection nga dapat pataasan sa 16 anyos ang edad sang makabig nga biktima sang statutory rape.
Sa layi subong suno sa natungdan, makabig nga statutory rape kun ang biktima ang naga-edad sang manubo sa 12 anyos kun sa diin ang biktima ang indi obligado nga magtestigo sa korte.
Kun ang mga biktima naman ang naga-edad sang 12 tubtub 17 anyos, kinahanglan nila nga mag-atubang sa korte agud pamatud-an nga nangin biktima sang pagpanghimulos.
Magluwas sa Statutory, may yara man sang kaso sang Incestuous kag Attempted rape nga kun indi matapna, mahimo magresulta sa suicide, depression kag pag-angkon sang Sexually Transmitted Diseases.
