Nagdako nga mabuot kag seryoso sa pangabuhi ang isa ka babaye nga breadwinner sa pamilya nga napun-an subong sang kontrobersiya matapos nasapwan ang iya bangkay sa Barangay Inangayan, Sta. Barbara, Iloilo.
Ang biktima amo si Claire Diergos, 36, residente sang Barangay Dagsaan, Buenavista, Guimaras, kag nagapuyo man sa Deca Homes Subdivision sa Pavia, Iloilo.
Sa interview sang Bombo Radyo kay Punong Barangay William Eslao sang Dagsaan, Buenavista, Guimaras, iya ginpahayag nga sang nakatapos sang elementarya kag highschool si Diergos, sa syudad sang Iloilo na ini nagpuyo agud padayunon ang iya nga pag-eskwela sa kolehiyo tubtob nga naka-trabaho.
Suno kay Eslao, sa Iloilo naman nakapamana ang babaye apang nagbulagay man sila sang iya nga bana.
Pahayag sang opisyal, sang nakatrabaho na sa Iloilo si Diergos, nagapauli lang ini sa Barangay Dagsaan kun may okasyon.
