ILOILO CITY – May yara lang sang tatlo ka calendar days si Mr. Juncae Manikan, ang pinuno sang Local Civil Registry, agud nga makasabat sa show cause order nga ginpaguwa ni Iloilo City Mayor Jerry Treñas.
Ang nasambit nga show cause order ang napetsahan sang Setyembre 19 kag pirmado sang alkalde.
Ini ang may kaangtanan sa ginapahayag 180 ka peke nga kasal nga ginrehistro sa Local Civil Registry santo sa tagreklamo nga ginhingadlan lang nga si Juan Dela Cruz.
Suno sa tagreklamo, ang wedding ceremony ang ginpatigayon sang tawo nga wala sang otoridad nga magpatigayon sang kasal kasubong ni dismissed Judge Ofelia Artuz.
Matandaan nga gintugyan na ni Treñas sa National Bureau of Investigation ang pag-usisa tuhoy sa peke nga kasal.
May kaangtanan diri, nagpaiway nga maghatag sang recorded ukon live interview si Manikan apang suno sa iya, sa Lunes nga adlaw siya magapaguwa sang statement tuhoy sa ginakaulamiran nga isyu.
Wala naman naghatag sang sabat si Manikan tuhoy sa pamangkot kun bala nalakip man sa mga rason sa paghatag sa iya sang show cause
order ang pag-assign sa bookeeper sang Local Civil Registry nga si Mr. Joemarie Esteral sa Calajunan Dumpsite.
Samtang, sa interview sang Bombo Radyo kay Treñas, iya ginpahayag nga kutub na lang sa Lunes nga adlaw ang plaso kay Manikan agud nga makasabat sa show cause order.
Katuyu-an sini suno kay Treñas amo nga mahibalu-an kun ano gid ang matuod.
