ILOILO CITY – Ginpanginwala ni Mr. Juncae Manikan, pinuno sang Local Civil Registry, nga siya ang sa likod sang pagpasaka sang kaso batok kay Iloilo City Mayor Jerry Treñas kag sa iban pa nga empleyado sang Iloilo City Government.
Sa interview sang Bombo Radyo kay Manikan, iya ginpahayag nga wala siya sang kahilabtanan sa pagpasaka sang kaso ni Mr. Jomarie Esteral, ang bookkeeper sang Local Civil Registry.
Suno kay Manikan, ang pagpasaka sang kaso ang isa ka personal nga desisyon sang tagreklamo kag wala sang kahilabtanan ang iban nga tawo.
May ikasarang man si Esteral suno kay Manikan nga magpasaka sang kaso paagi sa iya mga abyan nga abogado.
Indi naman niya mahangpan suno sa natungdan kun nga-a gin-angot ang iya pangalan kay Esteral.
Nahibalu-an nga si Esteral ang gin-assign sa Calajunan Dumpsite apisar isa siya ka bookkeeper sa Local Civil Registry kag ginapahayag bagman ni Manikan tuhoy sa ginapahayag 180 ka peke nga kasal nga ginrehistro sa nasambit nga talatapan.
