Nagalaum si former Iloilo Fifth District Representative Neil “Junjun” Tupas Jr., ang lead prosecutor sa 2012 impeachment trial ni anay Chief Justice Renato Corona, nga may matabo nga kompromiso sa Senado agud matalupangod ang isyu sang fairness kag due process sa impeachment case ni Vice President Sara Duterte.
Sa interview sang Bombo Radyo Iloilo kay Tupas, ginpaathag niya nga apisar gintugutan sang presiding officer ang pag-withdraw sang mga impeachment articles nga may kaangtanan sa grave threats kag confidential funds, nagapabilin ang reklamo sang depensa bangud napresentar na ang mga nasambit nga akusasyon bag-o gin-withdraw sang prosecution panel.
Suno kay Tupas, posible nga mahatagan sang limitado nga oras ang depensa agud sabton ang mga ginbasura nga akusasyon sa masunod nga hearing nga natalana sa Nobyembre 9, 2026.
Sa ini nga paagi, suno sa iya, mahimo nga may kahigayunan ang bise presidente nga maplastar ang iya nga bahin bisan pa gin-withdraw na ang iban nga articles of impeachment.
Ginpaathag man ni Tupas nga may kinalain ang ginhimo sang prosecution sa Corona impeachment trial sang 2012.
Sa walo ka impeachment articles batok kay Corona, tatlo ang ginpresentar kag ginpaidalom sa formal offer of evidence, samtang lima ang gin-withdraw bag-o pa mapresentar sa impeachment court.
Sa kaso ni Duterte, duwa ka articles na ang napresentar bag-o gin-withdraw gani may isyu kun makatarungan nga indi na mahatagan sang tsansa nga makasabat ang depensa.
Dugang pa ni Tupas importante nga mangibabaw ang due process bangud ang impeachment proceedings ang indi lamang isyu sang prosecution kag depensa kundi sang mga pumuluyo nga nagabantay diri.
