Nagpanawagan ang pamunuan sang Iloilo Police Provincial Office (IPPO) sa tanan nga police personnel nga mangin ehemplo sa kadam-an kag indi magpasaway.
Ini matapos nakalab-ot na sa IPPO ang natabo sa isa ka pulis nga nadakpan nga iligal nga nagbulang sa isa ka subdivision sa Brgy. Cagbang, Oton, Iloilo kag nagtrending matapos nakuhaan sang video nga nagadalagan sa kahon sang talamnan.
Ang pulis amo si Police Corporal Virgilio Rojo Jr., residente sang amo nga barangay, kag assigned sa General Services Office (GSO) sang Iloilo City Police Office (ICPO).
Sa exclusive interview sang Bombo Radyo kay IPPO Director Police Col. Gilbert Gorero, iya ginpahayag nga liwat-liwat siya nga nagapaandam sa mga pulis nga likawan ang tanan nga iligal nga buluhaton, apang may yara sa gihapon sang mga salawayon.
Suno kay Gorero, nagakadapat nga i-practice sang tanan nga pulis ang ‘leadership by example’ agud tahuron.
Nagapati man si Gorero nga apisar sin-o ka pa, kun may ginlapas nga layi, nagakadapat nga hatagan sang nagakaigo nga penalidad.
Nahibaluan nga ginpasakaan na sang kaso nga Illegal Gambling ang pulis lakip na ang apat niya ka kaupdanan.
