ILOILO CITY–Ginlaslasan sang League of Filipino Students (LFS) Panay ang pahayag sang militar nga sa ila organisasyon ginapaagi ang pag-recruit sang bag-o nga katapo sang  New People’s Army (NPA).
Sa interview sang Bombo Radyo kay Aya Primalion, taghambal sang LFS Panay, lunsay pato-pato lang kag wala sang kamtuoran ang mga istorya nga ginpaguwa ni Col. Benedict Arevalo, commander sang 3O1st Infantry Brigade (IB) sang Philippine Army.
Suno kay Primalion, tuman gid ka sala ang pahayag ni Arevalo nga ginapadala ukon ginapaupod ang mga kabataan padulong sa kabukiran agud mag-upod sa NPA.
Dugang pa niya nga ginabutang ni Arevalo sa ital-ital ang kabuhi sang mga kabataan nga yara subong sa organisasyon.
Imahinasyon lang sang katapo sang militar nga naga-intra ang LFS sa NPA.
Sa subong, padayon nga nagapakigbato ang mga pamatan-on indi lamang sa ila nga kinamatarong kundi ilabi na sa iban pa nga mga problema sang pungsod.