ILOILO CITY – Suportado sang League of Provinces of the Philippines ang pagpa-iway sang 2022 barangay kag Sangguniang Kabataan elections.
Suno sa presidente nga si South Cotabato Governor Reynaldo Tamayo, Jr., kadam-an sang mga gobernador ang nagapati nga kinahanglan ang pagpa-iway sang pinili-ay.
Ini ang suportado man sang Union of Local Authorities of the Philippines kun sa diin, intermin chairperson man si Tamayo.
Suno sa grupo, magagasto lang ang gobyerno sang binilyon ka pesos pagkatapos sang ginpatigayon nga national kag local elections sang Mayo.
Gin-ako ni Tamayo nga ulihi na ang pagpakita sang suporta sang mga gobernador sa pagpa-iway sang election bangud nga gin-aprubahan na sang Kongreso ang amo nga hagna kag nagahulat nalang sang approval ni President Ferdinand “Bongbong” Marcos, Jr.
Apang, nagapati si Tamayo nga mapamatian sang presidente ang ila opinyon antes ini makahimo sang desisyon.
Si Tamayo ang presidente man sang Partido Federal ng Pilipinas nga amo man ang grupo ni Marcos.
Nahibaluan nga antes pa man ang desisyon sang presidente, nagsugod na sang pagpanghanda ang Commission on Elections.
Magluwas sa revised election calendar, nasuguran na ang pag-imprinta sang balota.
