Napilian ang four-time NBA champion kag all-time NBA leading scorer nga si LeBron James bilang male flag bearer sang Estados Unidos sang Amerika sa opening ceremony sa Paris Olympics subong nga semana.
Ang iya partisipasyon sa Summer Games subong nga tuig amo ang naga-marka sang iya ikaapat na nga pagtapak sa Olympiada kun sa diin nakadaog na siya sang duha ka gold medals.
Sa statement naman sang 39-anyos nga basketball superstar, ginsiling sini nga isa ka daku nga dungog nga itiglawas ang Estados Unidos sa global stage ilabi na sa entablado kun sa diin naga-isa ang bilog nga kalibutan.
“For a kid from Akron, this responsibility means everything to not only myself, but to my family, all the kids in my hometown, my teammates, fellow Olympians, and so many people across the country with big aspirations.”
“Sports have the power to bring us all together and I’m proud to be a part of this important moment,” pahayag sini.
Ginabantayan pa kun sin-o ang mangin female counterpart ni James.
Mangin maragtason man ang opening ceremony sang Summer Games subong nga tuig bangud sa baylo nga stadium, matabo ang parada sa bantog nga River Seine sa atubang sang ginabanta 300,000 ka spectators.
Ginalauman nga halos 600 ka mga atleta ang ipadala sang US sa Paris Games kun sa diin 53% diri ang mga babaye.
