Naghimo sang panibag-o nga maragtas ang 39-anyos nga Los Angeles Lakers superstar nga si LeBron James bilang labing-una nga player sa National Basketball Association (NBA) nga nakalab-ot na sa 40,000 career points!
Ginhimo ini ni James kadungan sang 124-114 nga kapierdehan sang Lakers batok sa Denver Nuggets sa Crypto.com Arena.
Antes ang amo nga hampang, may 39,991 points ang nasambit nga four-time NBA champion matapos nga nagbubo sang 31 puntos sa hampang batok sa Washington Wizards sang nagligad nga semana.
Sang masunod nga timeout, ginhatagan ang basketball legend sang standing ovation kag may ginpagwa man nga in-arena video presentation nga ginsundan sang itsura sini nga nagabayaw sang bola.
Nahimo ini nga rekord masobra isa ka tuig matapos nga ginkilala man siya bilang all-time NBA scoring champion nga naglapaw pa sa napagkit ni Kareem Abdul-Jabbar.
Apisar sa iya nga edad, isa gihapon ang Lakers superstar sa top scorers sa iya ika-21 nga season sa liga. Base sa pinakaulihi nga ranking, nagapang-15 ini sa scoring subong nga season nga may 25.3 points, 7.9 assists kag 7.1 rebounds per game.
Madumduman nga si James man ang nagpanguna sa Lakers nga makuha ang labing-una nga NBA In-Season Tournament championship title kag amo man ang nagdala-pauli sang tournament Most Valuable Player (MVP) honors.
Magluwas sa sini nga rekord, si James man ang naga-isahanon nga NBA player nga may nahimo na nga at least 10,000 points, 10,000 rebounds kag 10,000 assists.#
(Photo: Sports Illustrated)
