Nagpirma ang basketball superstar nga si LeBron James sang bag-o nga duha-ka-tuig nga kontrata sa Los Angeles Lakers kag nagpasugot man nga mas manubo ang ibayad sa iya sa $104 million ukon P6.087-billion nga amo ang amount nga eligible siya kuntani nga mabaton.
Sa naga-guwa nga inisyal nga mga report, yara sa $101.35 million ukon P5.9-billion ang kontrata nga ginpirmahan sang 39-anyos nga Lakers veteran para makasulod sa ika-23 nga season sa iya karera nga amo ang pinakamalawig nga karera sa bug-os nga maragtas sang liga.
Ini nga pay cut ang katumbas sang malapit $2.7 million ukon P158-million.
Ang buhin sa sweldo ang makabulig man sa Lakers nga ma-address ang problema sini sa salary cap restrictions. Ginapahayag nga ang malapit $3 million nga pay cut kay James ang makabulig nga malikawan sang Lakers ang second apron penalties nga ginabanta magadangat sa $45,000.
Ginalantaw nga daku nga pabor ang ginhimo sang amo nga leading scorer ilabi na bangud una na sini gin-anunsyo nga handa siya nga batunon ang daku nga buhin sa bayad kun makuha sang Lakers ang isa sa premier free agents kaangay kay Klay Thompson ukon DeMar DeRozan. Apang pareho man nga nagpirma ang duha ka players sa lain nga NBA teams — si Thompson sa Mavs, kag si DeRozan sa Sacramento.
Ini na ang ikaduha nga tion nga nagpasugot si James nga may buhin sa ibayad sa iya.
Sang 2010, gin-report man nga nagpasugot man ini sa duha ka tuig nga $68-million ukon P3.98-billion nga kontrata sa Miami Heat. Bangud sa amo nga pay cut, nakatukod sang roster ang Heat nga nakadaog sang duha ka NBA titles kag apat ka sunod-sunod nga byahe sa NBA Finals.
