ILOILO CITY – Ginatinguhaan sang Local Economic Enterprise Office nga mapangitaan sang pwesto ang mga illegal vendor nga nagabaligya sa Jalandoni-Wilson, Iloilo City.
Ini matapos nga ginkumpiska sang Task Force Anti-Squatting and Illegal Structures Unit ang mga baligya sang vendors nga nagabaligya sa higad sang dalan.
Sa interview sang Bombo Radyo kay Maricel Mabaquiao, pinuno sang Local Economic Enterprise Office, iya ginpahayag nga may yara sang bakante nga kiosko sa Jaro Big Market kag mahimo ini nga maka-akomodar sang 50-100 vendors.
Suno kay Mabaquiao, mahimo nga makabaligya sa Jaro Big Market ang mga vendor humalin Biyernes tubtub Martes kag magluwas diri, available man ang portion sang fish section sang Iloilo Terminal Market humalin 11am-5pm.
Ang problema lang suno kay Mabaquiao amo nga indi magpasugot ang mga vendor bangud sa pila ka mga rason kag ila nga ginapanindugan nga mas maayo nga magbaligya na lang sila sa higad sang dalan agud nga makaginasya sang daku.
