ILOILO CITY – Ginapasiguro sang Local Economic Enterprise Office nga de-kalidad ang mga karne nga ginabaligya sa mga merkado sa syudad sang Iloilo.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga hugot nga ginapatuman ang quality control halin sa pag-ihaw sa mga sapat sa Iloilo City Slaughterhouse tubtub sa handling sang karne.
Suno kay Castañeda, padayon ang inspection agud nga masiguro nga matinlo ang ginabaligya sa merkado kag apisar holiday, on-call sa gihapon ang mga market-in-charge, collector kag meat inspector.
Magluwas sa kalidad sang produkto, ginpasiguro man sang natungdan nga wala sang price surging ukon pagtaas sang presyo nga nagakatabo subong nga holiday season.
