𝗜𝗟𝗢𝗜𝗟𝗢 𝗖𝗜𝗧𝗬 —Ginpanginwala sang Local Economic Enterprise Office (LEEO) nga pamulitika ang rason kon ngaa ginpahalin ang anay parking attendant nga si Josie Bendanillo sa serbisyo.
Ini kasunod man issue nga ginapahayag nga ang natungdan ang ginsipa ni Freddie Jarbadan, kagawad sang nasambit nga barangay kag supporter man ni Iloilo City Mayor Jerry Treñas.
Sa interview sang Bombo Radyo kay Maricel Mabaquiao, head sang Local Economic Enterprise Office, iya ginpahayag nga indi pamulitika ang rason kon ngaa ginpahalin si Bendanillo, ini bangud nga may mga sanctions ukon may nahimo ini nga indi dapat.
Suno kay Mabaquiao, Mayo 30, 2024 sang na-layout si Bendanillo matapos nga nakabaton sang reklamo ang ila nga talatapan batok sa natungdan bangud man sa pamatasan sini bilang isa ka parking attendant.
Ginpahayag man sini nga masami nagasobra ang cash ticket nga gina-issue sini sa mga naga-park, rason man agud nga ginkaksan ini sang trabaho.
Gintumod man sang natungdan nga ang mga bayolasyon ni Bendanillo ang nag-agi sa maid-id nga monitoring sang talatapan.
Nahibaluan nga makaduha na ka beses nga ginpatawag ang atensyon ni Bendanillo sa amo nga mga reklamo antes nga natigayon nga napahalin.
