ILOILO CITY – Nakahanda na nga maghatag sang inisyal nga rekomendasyon ang Local Economic Enterprise Office kay Iloilo City Mayor Jerry Treñas may kaangtanan sa mga market delinquencies sa merkado sa syudad.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga subong nga adlaw ipasa na niya ang first phase sang rekomendasyon sa alkalde sa diin validated na ini sang ahensya.
Suno kay Castañeda, matapos nga mapasa na ang rekomendasyon kay Mayor Treñas, ipatawag sini gilayon ang Committee on Market and Slaughterhouse sang Sangguniang Panlungsod agud hingyuon nga magpasar sang resolusyon nga magadeklarar nga bakante ang mga stalls nga ginpabay-an na kag wala na nakabayad sang renta sa madugay nga tion.
Laoman nga sa masunod nga semana, mahimoan na sang resolusyon sang Sangguniang Panlungsod ang pagdeklara nga bakante ang mga stalls sa sulod sang mga merkado sa syudad sang Iloilo.
Ini agud nga hatagan man sang oportunidad ang mga negosyante nga ma okupar ang pwesto apisar indi siya ang stall owner, apang kinahanglan anay nga ideklara nga bakante ang stall kag mahimo na ini gilayon nga mag apply.
Base sa rekord sang city government, ang merkado nga may pinakadako nga balor sang renta nga wala mabayadan amo ang Iloilo Central Market balor P42 million.
