ILOILO CITY – Ginklaro sang Iloilo City Local Economic and Enterprise Office (LEEO) nga ginapatuman ang “no MIC, no entry” policy sa mga merkado sa syudad.
Ini matapos man nga sang nagligad, may yara sang nadakpan ang National Meat Inspection Service (NMIS) – Region 6 nga wala sang meat inspection certificate (MIC) sa Jaro Big Market.
Sa interview sang Bombo Radyo kay Maricel Mabaquiao, head sang LEEO, iya ginpahayag nga may yara sang personnel nga amo ang naga-chekyar sang tanan nga mga karne nga nagasulod sa merkado.
Na-delegate naman sa mga market in-charge suno kay Mabaquiao ang tanan nga pagsulundan sa mga merkado.
Dugang pa niya, may yara sang in- house inspector ang LEEO nga naga upod sa Task Force Hot Meat sang syudad nga naga libot sa mga merkado agud nga mag-inspection.
Ang task force kag in-house inspectors ang naga upod man sa NMIS sa paglibot kag pag-chekyar sang mga karne.
